Frá markaði Svalanna í nóvember 2011

Markaðurinn tókst ákaflega vel. Endanlegt uppgjör mun ekki liggja fyrir fyrr en í byrjun desember, en ljóst er að markaðurinn hefur skilað á fjórðu milljón króna.

Það hefur verið okkur Svölum einstaklega gefandi og ánægjulegt að finna þann mikla samhug sem ríkt hefur og hve margir hafa verið tilbúnir að veita stuðning við að styrkja þetta góða málefni. Við sendum öllum hlutaðeigandi okkar bestu þakkir.

Hægt er að leggja inn á bankareikning   318 -  26 -  111577 -  570177-0959  til að styrkja Guðmund Felix Grétarsson.

Markaðurinn verður í Ými, Skógarhlíð 20, helgina 12. og 13. nóvember. Opið verður frá 10 til 6 báða dagana og allur ágóði rennur til Guðmundar Felix Grétarssonar en hann missti báða handleggi í vinnuslysi fyrir 14 árum.  Hann er nú á förum til Frakklands í handleggjaágræðslu sem er mjög kostnaðarsöm aðgerð. Guðmundur nýtur engra opinberra styrkja því aðgerðin flokkast undir tilraunalækningar og þær eru ekki styrktar.

Þann 11. nóvember kl. 10 til 6 verðum við Svölur í Ýmissalnum að taka á móti varningi á markaðinn frá þeim sem vilja og geta  lagt eitthvað af mörkum til þessa verðuga verkefnis. Ef þið getið ekki komið þennan dag getið þið haft samband  8. nóvember  við Soffíu í síma 6958778, Gretu í síma 8988959 eða Bryndísi í síma 8918198.

Sjáumst um helgina!

Senn líður að jólum og enn og aftur fara Svölurnar af stað með jólakortasölu sína. Hér gefur að líta hönnun ársins og hægt er að fá kortin brotin með texta eða óbrotin án texta. Kortin verða seld víðsvegar um höfuðborgarsvæðið en auk þess er hægt að panta þau með því að senda póst á svolurnar@simnet.is.

Jólakortin eru 4 í búnti á 500 kr. Einn litur í hverju búnti.

Munið að: ALLUR ÁGÓÐI AF SÖLU KORTANNA RENNUR ÓSKIPTUR TIL LÍKNARMÁLA.

Síðustu ár hafa Svölurnar einnig verið að selja gullituð gjafakort og silfurlituð minningarkort. Hægt er að panta þessi kort hjá Svölunum allt árið um kring og eru þau á sérstaklega góðu verði.

PANTA KORT

43 milljónir söfnuðust til um 130 góðgerðafélaga í Reykjavíkurmaraþoni 2011. Eins og kunnugt er studdu Svölurnar Guðmund Felix í gegnum styrktarfélagið Handahlaup.

Guðmundur Felix missti hendurnar í vinnuslysi árið 1998. Læknar telja mögulegt að græða á hann hendur. Slík aðgerð er ekki kostuð af ríkinu og því var félagið Handahlaup stofnað af systrunum á Bleikt.is. Tilgangur félagsins er að styrkja Guðmund Felix í handaágræðslunni en slík aðgerð kemur til með að kosta rúmar 20 milljónir króna.

Handahlaup safnaði rúmlega 1.600.000 krónum í áheitasöfnuninni og var félagið í fimmta sæti af þeim fjölda góðgerðafélaga sem þátt tóku. 120 hlauparar hlupu fyrir hönd Handahlaups. Sjálfur hljóp Guðmundur Felix 10 kílómetra í Reykjavíkurmaraþoni og tók í gær (7.sept) á móti viðurkenningu frá Maraþon.is þar sem hann var í 2. sæti allra einstakra hlaupara. Hann safnaði sjálfur rúmum 700.000 krónum í áheitasöfnuninni og telst það prýðilegur árangur.

Svölurnar styrktu Guðmund Felix um 500.000 krónur en fór sú fjárupphæð ekki í gegnum áheitasöfnunina heldur rann hún beint til Guðmundar.

Hlauparinn Guðmundur Felix hljóp kílómetrana 10 í jakka merktum Svölunum og fer þar flottur fulltrúi félagsins, eins og sjá má af meðfylgjandi mynd.

Freyja, Inga og Silja færa Guðmundi Felix styrkinn

Í Morgunblaðinu í síðastliðinni viku birtist grein um þann styrk sem Svölurnar hafa ákveðið að veita Guðmundi Felix Grétarssyni er hann hleypur 10 km í Reykjavíkurmaraþoninu 20. ágúst til að safna fyrir aðgerð.

Þrjár 11 ára stelpur sáu greinina um Svölurnar og Guðmund í blaðinu og ákváðu að leggja sitt af mörkum en ein stúlknanna er ömmubarn einnar Svölunnar og spurði ömmu sína mikið út í þennan styrk sem við veittum Guðmundi. Á örskömmum tíma höfðu þær haldið veglega tombólu og safnað 15 þúsund krónum sem þær færðu Guðmundi við hátíðlega athöfn.

Guðmundur Felix missti báða handleggi í vinnuslysi 1998 og er að vinna að því að fá grædda á sig handleggi og hefur í tvígang farið til færustu sérfræðinga á þessu sviði í Frakklandi og vonast eftir jákvæðu svari frá þeim í byrjun september. Svölurnar styrkja Guðmund Felix Reykjavíkurmaraþoninu um hálfa milljón króna en aðgerðin mun kosta 21 milljón króna. Þess má til gamans geta að Guðmundur Felix Grétarsson er titlaður „handlangari“ í símaskránni. Aðspurður segir hann það alveg rétt, hann langar í hendur og er því handlangari. Hægt er að styrkja Guðmund á hlaupasíðu hans hér að neðan.

Sjá nánar:
Myndband af stúlkunum af Youtubesíðu Bleikt.is
Frétt af Mbl.is um styrk Svalanna
Hlaupasíða Guðmundar Felix
Handahlaup á Facebook

Á þessu ári hafa Svölurnar styrkt MND Félagið, MS Setrið, Kraft og núna síðast Guðmund Felix Grétarsson, rafvirkja, en hann missti báða handleggi í vinnuslysi en á nú möguleika á að fara í handaágræðslu til Frakklands.

MND félagið er félag fólks með hreyfitaugahrörnun. Svölurnar hafa styrkt félagið um árabil og núna var okkur kleift að færa MND félaginu eina milljón króna til kaupa á loftlyftukerfi.

MND félagið festi kaup á loftlyftu fyrir styrk frá Svölunum

Í byrjun mai afhentu fulltrúar Svalanna, stjórnarmennirnir Soffía Stefánsdóttir, Bryndís Guðmundsdóttir og Birna Pálsdóttir, Berglindi Ólafsdóttur, framkvæmdastjóra MS félagsins  tvær milljónir og fimm hundruð þúsund krónur í styrk til verkefna félagsins.

Félagið færir öllum Svölum miklar þakkir og biður fyrir kærar kveðjur til allra.

Birna, Berglind, Bryndís og Soffía með fullt af peningum til góðs málefnis.

Svölurnar komu færandi hendi til MND félagsins. Þessir þrír fulltrúa félagsins færðu MND félaginu eina milljón króna til að styrkja lyfjarannsóknir.

Bryndís Guðmundsdóttir formaður Svalana afhendir Guðjóni Sigurðssyni gjafabréfið. Vinstra megin er Guðrún Tryggvadóttir,og til hægri er Soffía Stefánsdóttir.

SVÖLURNAR, félag fyrrverandi og núverandi flugfreyja kom færandi hendi í tilefni af 60 ára afmæli Reykjalundar og gaf sjúkraþjálfunardeildinni vegleg þjálfunartæki þ.e. göngubretti og sethjól, hvort tveggja þrekþjálfunartæki af gerðinni Cybex.

Tækin eru mjög vönduð og bera meiri þunga en þau sem eru fyrir.
Einnig gáfu Svölurnar fullkominn lyftubúnað í baðklefa við sundlaug sem auðveldar böð og flutning mikið fatlaðra einstaklinga í laug, bæði fyrir skjólstæðinginn sjálfan og starfsfólkið. Af þessu tilefni var boðið til móttöku og samsætis á sjúkraþjálfunardeildinni og Svölunum þakkað innilega fyrir vinsemd og stórhug.
Þess má geta að gjafafé Svalanna er eingöngu tilkomið sem ágóði af jólakortum, sem þær gefa út og selja árlega og er listamaðurinn oftast úr röðum félagsmanna.

Á myndinni eru fulltrúar Svalnanna sem komu á Reykjalund: Anna Þrúður Þorkelsdóttir, Fríða Valdimarsdóttir, Þórhildur Sandholt, Kristín Björnsdóttir, Rannveig Ásbjörnsdóttir og Aðalheiður Emilsdóttir.